Psa 8 | NdeIBE | STEP | Kumqondisi wokuhlabela. Ngendlela yegithithi. Ihubo likaDavida. O Jehova, Nkulunkulu wethu, ibizo lakho libabazeka kangaka emhlabeni wonke! Uyibekile inkazimulo yakho ngaphezulu emazulwini.

Psalms 8

1 O Jehova, Nkulunkulu wethu, ibizo lakho libabazeka kangaka emhlabeni wonke! Uyibekile inkazimulo yakho ngaphezulu emazulwini.

2 Ukumisile ukudunyiswa yizindebe zabantwana lezinsane ngenxa yezitha zakho, ukuze uthulise isitha lomphindiseli.

3 Nxa nginakana ngamazulu akho, umsebenzi weminwe yakho, inyanga lezinkanyezi ozibeke endaweni yazo,

4 uyini umuntu osungaze uzihluphe ngaye na, indodana yomuntu ukuthi uyinanze?

5 Wamenza wasilela kancane kulezidalwa zasezulwini, wamethesa umqhele wenkazimulo.

6 Wamenza umbusi phezu kwemisebenzi yezandla zakho; wabeka zonke izinto ngaphansi kwezinyawo zakhe:

7 yonke imihlambi yezimvu leyezinkomo lezinyamazana zeganga,

8 izinyoni zasemkhathini lezinhlanzi zolwandle, konke okuntsheza emigudwini yolwandle.

9 O Jehova, Nkulunkulu wethu, ibizo lakho libabazeka kangaka emhlabeni wonke!